Sól sól skín á mig....

Já ég er ennþá með smávegis ungbarnagulu ! Og mamma og pabbi vilja drífa í að fara að losna við þennan litarhátt, þess vegna reyna þau að hafa mig soldið mikið í dagsbirtunni, sem á að hjálpa. Vorum soldið úti á palli í dag til dæmis - en ekki samt í sólinni.

Annars erum við ekki búin að gera svo mikið í dag - annað en að vera í brjóstagjöfunum útí eitt! Sumir dagar eru svoleiðis. Pabbi fór reyndar í smá hjólatúr, og kom móður og másandi til baka....

Afmælisdagurinn hans Skarphéðins pabba/ afa

Í dag er afmælisdagurinn hans pabba (Halldóru). Sem dó í apríl sl. og á því aldrei eftir að sjá Skarphéðinn litla nafna sinn - þannig, en ég er viss um að hann fylgist nú samt með honum. Brosir í kampinn yfir því að hann hefur fengið skásetta augnsvipinn hans....

Skrítið hvernig eitthvað getur verið svona ENDANLEGT. Fyrir akkúrat ári síðan vorum við á Íslandi, og ég keypti kertaskreytingu handa pabba í afmælisgjöf, í kertagerðinni í Sandgerði, af því ég var að vinna þar smávegis í Fræðasetrinu Sandgerði. Ekki datt mér í hug þá að rúmu hálfu ári seinna myndi þessi skreyting standa uppstillt í erfidrykkjunni eftir jarðarförina hans .....

Hún Hjördís frænka mín var svo elskuleg að kaupa fyrir mig blóm og fara með til mömmu í dag, ég vissi að það myndi ylja henni um hjartaræturnar. Mamma var einmitt búin að vera að tala um að ef hún kæmist útí búð myndi hún kaupa blóm í tilefni dagsins, en hún er nú ekki beint mikið á ferðinni, og á ekki svo auðvelt með að skreppa í búð.

Ég fæddist með keisaraskurði þann 8. júlí á Danderyds sjúkrahúsinu. Allt gekk vel - nema hvað það var óvart skorið í hausinn á mér þegar það var verið að ná mér út !!! Hér er ein fyrsta myndin af mér - hjá tárvotum pabba, með Hrefnu stórusystur....

Ég á að heita Skarphéðinn, í höfuðið á honum afa mínum sem dó í apríl. Gamalt og gott kjarnyrt íslenskt nafn - fyrir stórmenni eins og okkur afa :-) . Enda erum við líkir, með sama augnsvipinn - kippir í Dýrafjarðarkynið.
Svo fæ ég annað nafn líka - það kemur í ljós seinna hvað það verður.

Hér eru fleiri myndir af mér frá spítalanum.

Ein mynd segir meira en...

Já nú erum við Skarpi sko komin á bloggið :-) . Ætlum að prófa það allavega.....Til að leyfa vinum og vandamönnum heima á Íslandi að fylgjast betur með okkur. Nei, það er ekki nóg að hafa heimasíðuna - við verðum að "hänga med" og blogga líka ......... :-)

Meiningin er að setja reglulega inn myndir hérna, það er miklu fljótlegra að birta myndir (og texta) hér en að gera heimasíður. Sjáum til hvað við verðum dugleg í þessu. Annars get ég sagt ykkur það að við mamma höfum sko nóg að gera í brjóstagjöf og bleyjum og því öllu - ég sé til þess að þau mamma og pabbi sitji ekki auðum höndum, þið skiljið.

Bæ í bili,
Skarpi snúlla.