Sýnatökuferð til Íslands

Þá er ég (Halldóra) komin aftur heim eftir blóðuga sýnatökuferð til Íslands.... En við Birgitta sem vinnur með mér fórum saman. Það fór ein vika í ferðina og þetta gekk þokkalega vel. Við tókum sýni úr þorski og ýsu, alls ca. 75 kvikindum. Skárum út lifur, heila, nýru, milta, kynkirtla, tálkn, þarm, blóð - jú neim it.... Þetta verður notað sem referens frá hreinum og ómenguðum svæðum í norsk-sænsku rannsóknarverkefni. Við unnum við sýnatökuna í Fræðasetrinu í Sandgerði, þar sem Háskóli Íslands er með aðstöðu.

Við fengum fiskinn lifandi í körum frá 2 bátum sem lönduðu í Keflavík. Þeir komu inn kl. 20 - 22 á kvöldin, þannig að það var unnið langt fram undir morgunn, og ekki mikill tími fyrir annað.... (H)eldri starfsmenn Sandgerðisbæjar sóttu fiskinn fyrir okkur á bíl með kerru - og voru orðnir doldið þreyttir á okkur þegar þetta var orðið kvöld eftir kvöld hátt í viku. Þá spurðu þeir pent: "Hérna, hvenær farið þið heim...?"
Hér eru myndir frá herlegheitunum, og texti neðst við hverja mynd einsog alltaf - reyndar á sænsku í þetta skiptið.

Þetta var í fyrsta skipti sem ég var svona lengi frá Skarphéðni, svo það var gott að koma heim og knúsa hann. Hann var líka glaður að sjá mömmu sína og knúsaði vel á móti.... :-)